Seeskulpie se kleuters is baie opgewonde oor Oupa- en Oumadag en om hulle grootouers by hulle oulike skool te verwelkom. Die kleuters trek soos Oupa's en Ouma's aan en hou lekker konsert tot vermaak van hulle groot ouers. Hierdie baie suksesvolle oggende word afgesluit met tee en koek en die kleuters en grootouers kuier baie lekker saam.

Seeskulpie se Graad R'e bied elke jaar 'n entrepreneursdag aan. Weke voor die tyd ontwerp hulle plakkate van dit wat hul op die dag gaan verkoop. Die plakkate word by die skool opgesit, sodat hulle hul produkte kan adverteer. Op die Saterdag verkoop hulle aan almal wat belangstel en verskeie pryse word toegeken aan die mooiste stalletjie en beste entrepreneurs.

Tydens die Entrepreneursdag kry al die kinders die geleentheid om aan die Mnr en Mej Seeskulpie deel te neem. Die doel is om die kinders met selfvertroue toe te rus en hule eie persoonlikheid te ontgin. Elkeen van die kinders by Seeskulpie is uniek en kosbaar. Die deelnemers word bederf met 'n heerlike verrassingspakkie.

Seeskulpie se konserte het al telkemale staande ovasie ontvang. Letterlik elke kleuter verskyn tydens die twee aande op die verhoog, hetsy dit is om 'n liedjie te sing of 'n dansie te doen. Die Graad R'e speel die hoofrolle en lei die verloop van die konsert. Selfs die donkie was al deel van 'n kersspel. Kom kyk gerus hoe doen Seeskulpie Kleinkindontwikkelingsentrum dit.